19 yanvar 2018-ci il tarixində Sofiya şəhərində Azərbaycan Respublikasının Bolqarıstan Respublikasındakı Səfirliyi və Müqəddəs Kliment Oxridski adına Sofiya Dövlət Universitetinin nəzdində fəaliyyət göstərən Bakı Slavyan Universitetinin Azərbaycan Dili və Mədəniyyəti Mərkəzinin birgə təşkilatçılığı ilə 1990-cı ilin 20 yanvar tarixində baş vermiş Qara Yanvar faciəsinin günahsız qurbanlarının xatirəsi yad edilib.

Anım mərasimində Bolqarıstandakı Azərbaycan diasporunun nümayəndələri, Bolqarıstan vətəndaşı olan həmvətənlərimiz, Azərbaycanlı tələbələr və “Azərbaycanın Dostları” Bolqarıstan-Azərbaycan Dostluq Cəmiyyətinin nümayəndələri iştirak ediblər.

Mərasimi giriş sözü ilə açan Azərbaycan Respublikasının Bolqarıstan Respublikasındakı səfiri Nərgiz Qurbanova 20 yanvar tarixində baş vermiş dəhşətli hadisələrin günahsız qurbanlarını yad etmək və Azərbaycanın müstəqilliyi uğrunda canlarını fəda etmiş soydaşlarımızı xatırlamaq üçün toplaşmış mərasim iştirakçılarına təşəkkürünü ifadə edib.

Azərbaycan xalqının azadlıq uğrunda mübarizəsinin tarixdə böyük faciələr və ağır itkilərlə müşayiət olunduğunu söyləyən səfir ümumxalq hüzn günü kimi qeyd etdiyimiz 20 yanvar tarixinin yaddaşlara Qara Yanvar kimi həkk olunduğunu, eyni zamanda Azərbaycan xalqının istiqlal yolunun ilk zirvəsinə və milli məfkurəmizin azadlıq istəyinin oyanış gününə çevrildiyini vurğulayıb.

Tarixi prizmadan yanaşdıqda Qara Yanvara aparan yolun məhz 1988-ci ilin ziddiyyətli hadisələrindən başlandığını bildirən N.Qurbanova Sovet rəhbərliyinin xeyir-duası ilə Ermənistanın Azərbaycana qarşı başladığı əsassız ərazi iddialarının xalqımıza qarşı repressiya və etnik dözümsüzlüklə nəticələndiyini, qəddar hücumlar nəticəsində, 250 mindən artıq azərbaycanlının Ermənistan ərazisindəki əsrlərboyu yaşadıqları doğma yurdlarını tərk etməyə məcbur edildiyini vurğulayıb. Ermənistandan kütləvi deportasiyaları zamanı ən azı 216 azərbaycanlının ermənilər tərəfindən öldürüldüyü, 1154 nəfərinin yaralandığı, Azərbaycan xalqının isə Sovet rəhbərliyinin məkrli planlarına etiraz edərək Dağlıq Qarabağda ermənilərin separatçı və ekstremist hərəkətlərinin qarşısının alınmasını, ədalətin bərpa olunmasını demokratik yollarla tələb etdiyi mərasim iştirakçılarının diqqətinə çatdırılıb.

Diplomat xalqın dinc və haqlı tələblərinə M.Qorbaçov hökumətinin amansızasına cavab verdiyini bildirərək 1990-cı il yanvar ayının 19-dan 20-nə keçən gecə Stavropol, Krasnodar və Rostovdan səfərbərliyə alınan xüsusi təlim keçmiş erməni əsilli əsgər və zabitlərin də iştirak etdiyi SSRİ Müdafiə Nazirliyinin bölmələri, DİN-in  xüsusi təyinatlıları və SSRİ DTK-nın “Alfa” qrupun üzvləri tərəfindən mülki əhalinin gülləbarana tutulduğunu vurğulayıb. Daha sonra Bakının xüsusi qəddarlıqla zəbt olunduğu, hərbi hücum nəticəsində 147 nəfər Azərbaycan vətəndaşının öldürüldüyü, 744 nəfərin yaralandığı, 841 nəfərin isə əsassız həbs olunduğu barədə iştirakçılara məlumat verilib.

Törədilən faciə zamanı Sovet silahlı qüvvələrinin nəinki mülki şəxslərə, yaşayış binalarına, mağazalar, tibb və digər müəssisələrə atəş açdığını, hətta təcili tibbi yardım maşınlarını da hədəfə aldığını xatırladan N.Qurbanova yaralı insanlara belə yardım göstərilməsinə imkan verilmədiyini diqqətə çatdırıb. Səfir deyib ki, bir çox mülki şəxs mənzillərin və  binaların girişində, habelə ictimai yerlərdə güllələnmiş, güllələrin dağıdıcı təsiri ölümsonrası tibbi ekspertiza zamanı məhkəmə ekspertləri və həkimlər tərəfindən öz təsdiqini tapıb.

Qabaqcadan düşünülüb hazırlanmış bu təcavüzkar aksiya ilə Azərbaycan xalqının demokratiya və milli azadlıq uğrunda mübarizəsini boğmaq, xalqa mənəvi zərbə vurmaq məqsədinin güdüldüyünü ifadə edən diplomat bu zaman insan hüquqlarına dair bir çox beynəlxalq öhdəliklərin, habelə keçmiş SSRİ və Azərbaycan SSR-in konstitusiyalarının kobudcasına pozulduğunu iştirakçıların diqqətinə çatdırıb.

Azərbaycan xalqını müsibətə düçar etmiş 20 yanvar faciəsinin bütün dünyada əks-səda doğurduğunu səsləndirən səfir bu beynəlxalq ictimai rəyin formalaşmasında ümummilli lider Heydər Əliyevin müstəsna xidməti barədə məlumat verib. N.Qurbanova qeyd edib ki, özünün və yaxınlarının həyatını təhlükə qarşısında qoyan ulu öndər yanvarın 21-də ilk olaraq Azərbaycanın Moskvadakı daimi nümayəndəliyinə gəlib, buraya yığışmış azərbaycanlılar qarşısında çıxış edib, ardınca mətbuat konfransı keçirərək imperiya siyasətini və M.Qorbaçovun xalqımıza qarşı məkrli fəaliyyətini tənqid edib.

Səfir Sovet imperiyasının günahsız insanların qanını axıtsa da, xalqımıza qarşı misli görünməmiş qəddarlıq etsə də, istəyinə nail ola bilmədiyini, milli qürurumuzu qırmağı bacarmadığını qeyd edərək Qara Yanvarın Azərbaycanın azadlığı və ərazi bütövlüyü uğrunda mübarizə tarixinə həm də qəhrəmanlıq səhifəsi kimi əbədi həkk olunduğunu vurğulayıb. Faciənin qəhrəmanlıq dastanı kimi  Azərbaycan elmi-ədəbi mühitində yeni səhifə açmasından danışan N.Qurbanova şəhidlərimizin əziz xatirəsinə mahnı və musiqi kompozisiyalarının bəstələnməsindən, filmlərin ithaf olunmasından, əsərlərin həsr olunmasından və tamaşaların qoyulmasından bəhs edib.

Daha sonra Azərbaycan müstəqilliyinin həqiqətə çevrilməsi naminə canlarını fəda etmiş soydaşlarımızın şücaətini əsərlərin dili ilə təcəssüm etdirən film nümayiş olunub.

Tədbirin sonunda Qara Yanvar gecəsində canlarını qurban vermiş soydaşlarımızın əziz xatirəsinə ehsan süfrəsi açılıb.